Ibne Safi Digital

دوسری بیوی ؟
دسمبر شروع ہی ہوا تھا لیکن پارہ بہت نیچے گر چکا تھا ۔ نہایت سرد رات تھی ابھی ساڑھے نو ہی بجے لیکن گمان آدھی رات کا ہو رہا تھا ۔ کرنل فرید ی اور کیپٹن حمید دیر تک آفس میں سر کھپانے کے بعدگھر لوٹ آئے تھے ۔ گو حمید باہر ہی کھانے کی ضد کر رہا تھا لیکن فریدی اسے بڑی مشکل سے گھر ہی کھینچ لایا تھا کیونکہ اس کو گھر پر بھی کام کرنا تھا جس کے لئے حمید ضروری تھا ۔
دونوں کھانے سے فارغ ہو کر کافی پینے لائبریری میں بیٹھے ہی تھے کہ ملازم نے بتایا کہ قاسم آیا ہے ، قاسم کے لئے وزیٹنگ کارڈ دینا یا ملازم سے کہلوانا ضروری نہیں تھا ۔ لیکن گھر لوٹتے ہی فریدی نے ملازموں کو ہدایت دے تھی کہ کسی کو بھی اجازت کے بغیر اندر نہ آنے دیا جائے ۔ جب قاسم لائبریری پہنچا تو اس کا موڈ بے حد خراب تھا ۔ اس نے چھوٹتے ہی کہا ’’ مجھے قیوں روقا قیا ، وہ حمید کو گھورتے ہوئے بولا ‘‘ ۔
لیکن حمید کی نظر اس خوبصورت لڑکی پر جمی تھی جو قاسم کا بازو تھامے اس کے پہلو میں کھڑی تھی ۔ لڑکی مغربی تھی لیکن لباس مشرقی تھا اور اس نے نقاب سے چہرہ چھپا رکھا تھا ۔ بیوی تو ہو نہیں سکتی حمید نے سوچا وہ تو چھوٹے قد کی چھوئی موئی سی ہے اور یہ لڑکی قدرے دراز قد تھی ، برقعے کی باوجود بھی اندازہ لگایا جا سکتا تھا کہ متناسب الاعضا بھی ہے۔
قاسم کی نظریں حمید پر جمی تھیں اس نے ابھی تک شائد فریدی کو نہیں دیکھا تھا اس لئے دھاڑا ’’ قیوں قیوں قھور رہے ہو ؟
حمید کے جواب دینے سے پہلے فریدی بولا ’’ کیوں شور مچا رہے ہو ؟ اور یہ لڑکی کون ہے تمہارے ساتھ ؟
فریدی کی گرج دار آواز سنتے ہی قاسم بوکھلاگیا اور بولا ’’ آپ ، میں آپ ہی سے ملنے آیا ہوں ۔
بیٹھو اور بولو کیا بات ہے ؟ فریدی نے کہا۔
م ممیں شادی کر رہا ہوں ، قاسم ہکلایا ۔
شادی ؟ تمہاری شادی تو برسو ں پہلے تمہارے باپ نے کرادی تھی ؟ حمید بولا
تم چپ رہو ، قاسم غرّایا، میں دوسری شادی کر رہا ہوں ، اور مجھے آپ کی مدد چاہئے ، وہ فریدی کو دیکھتے ہوئے بولا ۔
کیا تمہارے باپ کو اطلاع ہے ؟ فریدی نے پوچھا۔
اور کیا چ چ چپاتی بیگم بھی جانتی ہی ؟ حمید نے دھمکایا ۔
حمید بھائی تم کچھ دیر چپ ہی رہو ۔ قاسم نہایت سنجیدگی سے اور صاف شستہ زبان میں بولا ۔
حمید کو اس کی سنجیدگی پر بڑی حیرت اور لہجے پر تعجب ہوا۔
فریدی بولا ’’ ہاں بولو قاسم ، میں سن رہا ہوں ‘‘۔
فریدی صاحب پہلے مولوی صاحب کو بلا لیں ، وہ گاڑی میں بیٹھے ہیں ۔
کون ؟ مولوی صاحب ؟ فریدی نے سوال کیا ۔
جی ہاں ، ہمارے خاندانی نکاح خواں ہیں، ان کے دادا نے میرے دادا کا اور ان کے باپ نے میرے باپ کا اور میرا نکاح پڑھایا تھا، اور اب یہ میرا دوسرا نکاح پڑھائیں گے ۔
لیکن انہیں یہاں کیوں لائے ہو ؟ فریدی نے پھر سوال کیا ۔
نکاح کے فوری بعد اگر انہوں نے میرے باپ کا بتادیا تو غضب ہو جائےگا ۔ قاسم ہکلائے اور غوں غاں کئے بغیر بولا۔ میں چاہتا ہوں کہ ہمارے ملک سے باہر جانے تک نکاح خواں آپ کی تحویل میں رہے۔
لیکن یہ تو حبس بیجا کا کیس ہو جائے گا میں تمہاری کو مدد نہیں کرسکتا ۔ فریدی نے کہا، آخر وہ کسی بھی غیر قانونی کام میں کیسے ملوث ہو سکتا تھا ۔
قاسم نے کہا فریدی صاحب یہ اغوا یا حبس بیجا کا معاملہ نہیں ہے بلکہ ’’ مصلحت ‘‘ ہے ۔ اور ان کو ہماری روانگی تک ہی روکنا ہے ، تاکہ میرے باپ کا غصے سے ہارٹ فیل نہ ہو جائے ۔ ہم نکاح کے فوری بعد سویٹزر لیند جا رہے ہیں اور پندرہ دن بعد جب لوٹیں گے تو ہم دونوں ہی والد صاحب قبلہ کے سامنے حاضری دیں گے ۔ اس وقت تک غصہ ٹھنڈا ہو جائے گا ۔
حمید بولا ابے یہ تو سقراط کی زبان کب سے بولنے لگا ہے اور پھر یہ تو کھلا اغوا کا کیس ہے ۔
قاسم سر جھکا ئے خاموش ہی رہا۔
لڑکی جو اب تک چپ رہی تھی نقاب الٹ کر بول پڑی نہیں حمید بھائی فریدی صاحب آپ لوگ قاسم کے والد کو آگاہ نہیں کریں گے ، آپ ہماری مددکریں گے ۔
فریدی اور حمید دونوں لڑکی کو حیرت سے دیکھنے لگے چہرہ جانا پہچانا لگ رہا تھا، فریدی نے سگار سلگاتے ہوئے کہا ،اوہ تو یہ تم ہو ۔
حمید پھر بھی پہچان نہیں سکا۔
لڑکی بولی جی ہاں میں کارسیکا ہوں۔
نام سن کر حمید کی آنکھیں حیرت سے پھٹ گئیں اس نے کہا لیکن تم نے یہ کیا حلیہ بنا رکھا ہے ؟ حمید نے پوچھا۔
کارسیکا بولی آپ دونوں صاحبان تو جانتے ہی ہیں کہ میں قاسم کے معاملے میں بے حد سنجیدہ تھی ۔ لیکن آپ لوگوں نے میری بات کو مذاق سمجھا، میں وطن لوٹی اور وہاں میں نے آپ کے ملک کے کئی گھرانوں سے دوستی کی ، بول چال ، رہن سہن ، لباس ، آداب اور طور طریقے سب سیکھے اور قاسم کے لئے میں نے آپ لوگوں کا مذہب بھی اپنا لیا مذہبی امور سے آگاہی حاصل کی اور تمام امور میں پرفیکٹ ہو نے کے بعد ایک ہفتہ قبل یہاں آئی ، قاسم کو ڈھونڈھ نکالا اور گذشتہ تین دنوں سے ہم شادی کا پروگرام بنا رہے تھے ۔ آپ تو جانتے ہیں کہ قاسم باپ سے کتنا ڈرتے ہیں، بہت سمجھانے کے بعد بڑی مشکل سے نکاح کے لئے راضی ہوئے، لیکن اس شرط پر کہ نکاح کے فوری بعد ہم کم سے کم ایک ماہ کے لئے ملک سے باہر چلے جائیں گے اور اس وقت تک آپ اور حمید بھائی قاسم کے والد کو سمجھائیں گے ۔
اوہ تو یہ بات ہے ، فریدی بولا حمید چپ ہی رہا وہ کچھ بول کر قاسم کو غصہ دلانا نہیں چاہتا تھا، نہایت حساس معاملہ تھا ، اور قاسم اس کو ایسے گھور رہا تھا جیسے اگر وہ ایک لفظ بھی بولے گا تو اس کو اٹھاکر پٹخ دے گا ۔
لیکن یہی ملّا کیو ں ؟فریدی نے سوال کیا ۔
قاسم بے شرمی سے بولا ، کیونکہ اگر کوئی دوسرا نکاح خواں ہو گا تو والد صاحب نکاح نا منظور کردیں گے ۔
کارسیکا بولی فریدی صاحب پلیز ہماری مدد کریں، اور صرف اتنا ہی نہیں ہمارے پاس ویزا بھی نہیں ہے ۔ اور میں چاہتی ہوں کہ آپ ہمارے لئے نئے پاسپورٹ بھی بنوا دیں جن میں ہمیں میاں بیوی کی حیثیت ہو ۔
یہ کیا کہہ رہے تم دونوں ، حمید بولا۔
کارسیکا ہی نے کہا تین دن سے ہم انہی معاملات پر غور کرتے رہے ہیں، اور اس نتیجے پر پہنچے کے آپ دونوں کی مدد کے بغیر ہمارا یہ منصوبہ کامیاب نہیں ہو سکتا۔ قاسم کو یقین ہے کہ برسوں کے تعلقات ، میری محبت اور عاصم صاحب کی سختیوں کے باعث آپ ضرور مدد کریں گے ۔
فریدی گہری سوچ میں ڈوب گیا ، اور حمید کی طرف رخ کرکے بولا ، کیا کہتے ہو کردیں قاسم کی مدد ؟
اس سے پہلے کی حمید کچھ بولتا ملازم نے آکر اطلاع دی کے انور اور رشیدہ ملنا چاہتے ہیں ۔